Na ja… 5 Stern isch anderst!! Äs chönt dra glägä ha, dass,

uf äm Campingplatz äs Summernachtsfäscht statt gfundä hät, oder uf dä anderä Seesiitä dä DJ wo detä ufgleit hät für ä Party hät welä mit dem vo euisäm Platz konkurierä, oder, dass mir vo dä Reis ä so nuddelfertig gsie sind und das ganzä gejole vo Gordula Grün, ich bau dir ein Schloss, Tage wie diese, Sarà Perchè Ti Amo, Hulapalu und so wieter, eifach nöd vertreit händ. Äs wär sicher besser gsie, wänn mir eus ufbrätzälät hetäd und eus dära joländä Meute agschlossä hettäd!!

Aber bim ufbrätzälä fangts ja scho a… mir sind diä Duschänä go aluegä… Nei, sorry das han ich nöd welä!!!!! Also händ mir euisi Duschi im Camper igweit!! Das isch äs Abentür für sich gsie! Uf dä Foti gseht mä ja, dass äs kein Wellnesstempel isch. Aber Suuuuuuuuuber!!! Dä Mike und ich sind ja jetzt au nöd grad diä Schlänkstä… aber mir händs gschafft. Ok, sWasser isch arschchalt gsie, aber äs isch ja schliesslich au Summer und ä mega wärmi dä ganz Tag gsie. Nei, Spass bei Seite, mir händ ä kei Ahnig gha, wiä us dä Duschi warms Wasser sel usä cho. (Mir händ eus das Wüssä mitlerwiilä ageignäd!!) Sodeli, früsch duschäd und tod müed hämmer also beidi beschlossä, mir gönd is Bett. Jaaaaaa……… isch au nöd so eifach gsie wiä mir eus das Vorgstellt händ. Au da gseht mä uf dä Foti, isch jetzt halt au nöd grad äs Kingsize Bett!! Ganz gnau isch äs 140x190cm. Di Hei hämmer ja äs 160 cm breits Bett, set ja jetzt nöd so äs Problem sie… diä 20cm machäd dä Bratä au nö feiss! Ohhhhh doch, dass macht dä Bratä sogar sehr feiss!! Also dSituation gseht volgender massä us… chli äs schmals Bett, zwei Patys, und zwei Mänschä wo tot müed sind. Ganz eifach, schlafä und guet isch. Das wärs gsie!! Aber da hämmer dRächnig nöd mit äm Wätter gmacht. Chum simmer igschlaffä, isch äs dussä los gangä… ganz fin mit tröpflä und äs Lüftli und dänn aber ziemli rassig mit güssä und stürmä. Ja, mir sind natürlich ufgwacht und händ müesä usä go eusäs Zügs dussä retä. Markisä inä, Stüel zämä und under dä CHlapf und dä Tisch im Camper vertaua. Blöd isch au gsie, dass mir händ müesä Fänster fascht ganz zuä machä. Mir händ scho bi offnä Feischter sGfühl gha mir verschmachtäd…….

Irgend wänn simmer dänn wieder igschlaffä und bim erstä Sunnästrahl verwachäd. Ahhh und no öppis……… ich han no niä so viel müesä ufsta und uf sWC!!! (jedäs mal über dä ander inä chlädärä) Ich würd mal sägä, für diä ersti Nacht…