Nach ä rä wieder ä mal super Fahrt dur Wälder, a Seeä und Flüss verbie, hämmer imä mega herzigä Kaffi aghaltä und äs Päusli gmacht

Am Namitag simmer bi dä Schwiizer Uswanderfamiliä Rotzler a cho….. https://timber-lodge.se

Da schlafäd mir i euisäm CHlapf ei Nacht und dänn gats wiiter Richtig Nordkap….. ohhhhhh…… han no sälber glismeti Söckä vo nä rä Schwedischä Grosi kauft……. Mä weiss ja niä🥶 i dä Nacht wirds amäl so 13 Grad….. dä Tag durä so 18 Grad.

Ich wot ja nid blöffä…… aber diä Bratherdöpfel sind also sehr glungä☺️ Spiegeleier🍳 au, aber dä CHlapf isch bizzeli bizzeli schief gstandä🤭, wännt äs Ei i Pfannä gschlagä häsch, sind alli wiitärä uf ä nand obä glägä😂🤣….. äs sind halt CHlapf-Eier😉!!

Judihui…….. kei Werbig meh uf dem Blogg!! Dankä Mike😘

Hüt ä morgä hämmer eusäs Bündeli zämä packt, dä CHlapf wieder rütelsicher gmacht und eus vo dä guetä Gastgeber Anja und Frank verabschiedäd. Mir händ ja schliesslich öppis vor…… sNordkap chunt eus ja nid entgägä😂 Euisi nächst Etapä gat bis uf Stöllet. Dä Campingplatz Björkebo set äs Bijou sie…. Mal luegä was euis erwartäd. Uf jedä Fall müemer unterwägs no Högä (Hacken😜) chauffä….. ich mues chönä Zügs ufhänkä!! Und mä cha ja schliesslich niä gnueg Högä ha, oder? Mir sind inän Dollar Store….. ich han no niä so vieeeeeeeeeeeeeeeeel Zügs gseh imä Ladä!!!! Ja, sMeistä isch Ramsch, aber mir händ eusi Högä gfundä💪🏻 Mit Högä im Gepäck simmer loos Richtig Campingplatz. Mir sind 3,5h unterwägs gsie……. Dä Mike isch gfahrä (er chas eifach besser☺️)und ich han Ussicht gnossä!! Wälder, leeri Strassä, Seeä und Flüss und sehr interesannti Wägwiiser. Bin immer im Handy im Übersetzer am Nämi ige…… mä chönt eigentlich sägä, ich seg im Schwedä Studium🧑‍🎓. Zum Biiesbiel: gårdsbutik = Hofladen / loppi = Flohmarkt / kulle = Hügel / flöde = Fluss und öppen heisst offen……. gar nöd sooooooo schwär🙈😇 bin fliessig am üebä!!🥴😜 !! Uf äm Campingplatz acho, simmer sehr positiv überrascht wordä…… wunder schööön🥰 alläs grüen, diräkt am Fluss (kei Ahnig wiä dä heisst🤭) und fascht ä kei Lüüt. Mir händ dänn grad die Sanitärä Ahlagä inspiziert (chli druck uf dä Leitig😱) wunder schööön!! Sehr suuber und sehr modern gmacht. Chani nur empfehlä, fals mal öppert grad zuefällig da i dä Nächi wär😉. sWätter isch au schööööön gsie….., ja gsie!! Jetzt schiffäds🌧️🌧️🌧️🌧️🌧️🌧️🌧️!! Wo anä jetzt mit dä nassä Duschtüecher? Guet han ich mir vo dä Anja ä Wöschleinä schänkä la🙏 Jetzt gehts i eusäm CHlapf chli us wiä inärä Wöscherei. Und, mir zwei müend euis ja jetzt au no beschäftigä……. dussä schiffäds und im CHlapf gat Post ab….. dä Mike am Compi 👨🏼‍💻, sIPad am Krimi sändä, dWösch am dröchnä und ich so chli am Krimi luegä und ……. yäss…… am Blogg schriebä!! Isch no gmüetlich….. aber simmer ehrlich, äs cha sich eh nur immer einä im CHlapf bewegä!! Ohhhh….. ich han hüt no ä Premierä am Chochherd vor👩‍🍳!! Bis jetzt hämmer dä Herd no niä bruucht…… dä Grill scho, aber HÜT isch äs so wiit. Ich probierä Herdöpfel z‘chochä und dänn Bratherdöpfel und Spiegeleier zmachä💪🏻 Mal luegä……..

Gester simmer nach 6 Stündiger Fahrt dur Wälder näbäd Seen und denä typischä Schwedähüüser verbie, bi dä Anja und äm Frank achoo!! Mir dörfäd da i iräm Gartä campierä…… Diä zwei sind grad sälber chli in Camping-Stimmig!! Sie läbäd chli im Wohnwagä und händ äs riisä Zält ufgstellt wo als Ussächuchi und Ässzimmer dient. Ihräs Schwedähuus sinds am Umbauä/Usbauä💪🏻 Wänn dänn das mal fertig isch……. Isch das äs richtig äs schöööns Bijou🥰 ……, aber das gat no chli.

 

Hoppla… und scho simmer in Malmö Schweden!!

So eifach isch das aber nid gsie 🤪

Gmüetlich simmer a euisäm letschtä Ort abgfahrä. Mir händ sogar no ä Kaffi Pausä gmacht…. Chum simmer nach Kaffi und Pipi-Box wieder uf dä Autobahn gsie, simmer gstandä!!!! Ja GSTANDÄ!! Kein Millimeter simmer vorwärts cho 😫

🚕🚗🚙🚚🚛🚕🚗🚙🚚🚛🚕🚗🚙🚚🚛🚕🚗🚙

Was au immer gsie isch… mir händ kei Ahnig!! Nach über einärä Stund händ alli müesä vo därä Autobahn abä…….. dur chlini herzigi Dörfli. Riiiiiiiesä Laschtwägä, einä nach äm anderä mit meischtens 30 km/h Richtig nöchster Autobahnifahrt. Sind würklich ganz herzigi Dörfli gsie 🥰

Dä Mike, wo am Stür ghöckläd isch, isch immer nervöser wordä. Dä Kahn wo euis uf Schwedä bringt, fahrt am 21:45 Uhr ab…… mit oder ohni euis!! Min Fahrer isch erstuhnlich ruhig 🤣😂😇

Ich han jetzt grad uf äm Check-In Billet gluegät… mir sind 21:31 Uhr uf dä Kahn gfahrä🙈 Lego mio, händ mir Glöggli gha!! Mir sind die allerletschtä gsie… hinter euis händs Tor ufä la und scho simmer abgfahrä. dLüt wo obä abä gluegäd händ, händ zum Glück nöd no blöödi Bemerkigä gmacht!! Mir händs gschafft 💃💃💃💃💃💃💃💃💃💃💃💃💃💃💃💃 und mir sind gschafft!! No gschnäll chli uf Backboard go usäluegä und dänn simmer i euisi Koiä go pfuusä. Immer schööööön mit ä mä Motorägrüsch im Ohr🥴. Am 06:00 Uhr hät euis ä Stimm us äm Lutsprächer gweckt. Ich wiä äs jungs Rehli vom Kaihütäbett abä und under Duschi……

Und scho höckläd mir im Chlapf und fahräd us äm Fährhafä in Malmö.

Hüt ziend mir mit eusäm CHlapf wieter… aber das heisst, dä ganzi Huushalt wieder veruumä das äs bim fahrä nöd rumpläd und nüt zflügä chunt!! Dä Mike isch verantwortlich für ussä am CHlapf und ich mach alläs dinnä ready. ER: alli Fänster zuä, Stohmkabel versorgä, Uffahrtkeil iirumä, Markiesä inä und das ganzä Gartästühl Zügs iruumä…… dänn mit äm CHlapf zur Entsorgigsstation fahrä… Grauwasser ablaaa, WC-Kassettä läärä🤪!! ICH: ohhh mein Gott wo fang ich da a……. Ich han so guet wiäs gangä isch alläs ä so versorgät, das äs nid chlaperäd bim Fahrä, aber das ichs wieder find!! So chli dä CHlapf au isch, mir händ erst gester Zabig eusäs Tablet zum Fernseh luegä gfundä🙈 ….. ja, hans halt sehr guet versorget😇. Jetzt wo mer am fahrä sind, mues ich scho no ehrlich zuägä, äs chlaperäd äs bizzeli, aber lit no dinä!! Nächst Mal wirds besser!!